സര്‍ഗ്ഗ ശക്തിയെ സംഹരിക്കുന്നതാണോ സാങ്കേതികവിദ്യ. ഇക്കാര്യത്തില്‍ സുവിദിതമായ ഒരഭിപ്രായം വിഷമകരമാണ്. സംഗീതം മുതല്‍ സാഹിത്യം വരെ ആധുനിക സാങ്കേതിക വിദ്യയുടെ സഹായത്തോടെ മാറ്റി മറിക്കപ്പെടുകയാണ്. മനുഷ്യസാധ്യമല്ല എന്ന് കരുതിയിരുന്ന പല കാര്യങ്ങളും ഇന്ന് കൈപ്പിടിയില്‍ ഒതുക്കാന്‍ നമുക്ക് സാധിച്ചിട്ടുണ്ട്. മനുഷ്യമനസ്സിന്‍റെയും ചേതന യുടെയും എല്ലാം അനന്തമായ സാധ്യതകളെ സാക്ഷാത്കരിക്കാന്‍ സാങ്കേതികവിദ്യയുടെ വളര്‍ച്ച സഹായകരമായി. വാസ്തുവിദ്യയുടെ പശ്ചാത്തലത്തിലും ഇത് അന്വര്‍ത്ഥമാണ്. ഏറ്റവും അധികം വിപ്ലവകരമായ മാറ്റങ്ങള്‍ എത്തിയത് വാസ്തുകലയിലാണ്. നിര്‍മ്മാണ ഘട്ടത്തിലെ പുരോഗതി, രൂപകല്പനയിലെ കുതിച്ചുചാട്ടവുമായി താരതമ്യപ്പെടുത്തുമ്പോള്‍ തുലോം തുച്ഛമാണ്. ഇന്ന് വീടുപണിയുടെ ആലോചനാഘട്ടത്തില്‍ തന്നെ അതിന്‍റെ അകവും പുറവും പൂര്‍ണ്ണരൂപത്തില്‍ അനുഭവവേദ്യമാക്കുവാന്‍ ആധുനികശാസ്ത്ര വളര്‍ച്ച പ്രാപ്തമായി കഴിഞ്ഞു. അതുകൊണ്ട്തന്നെ നിര്‍മ്മാണ ഘട്ടത്തിലെ തെറ്റുകള്‍ പരമാവധി കുറയ്ക്കുവാനും ചെലവ് നിയന്ത്രിക്കുവാനും എല്ലാ അര്‍ത്ഥത്തിലും മനസ്സിനിണങ്ങിയ രൂപ രേഖ സാക്ഷാത്കരിക്കുവാനും ഇന്ന് സാധിക്കുന്നു. എന്നാല്‍ ഈ ശാസ്ത്രസങ്കേതങ്ങളെ വേണ്ടത്ര ഉപയോഗത്തിലാക്കാന്‍ കേരളത്തിലെ വാസ്തുശില്പികള്‍ക്ക് കഴിയുന്നുണ്ടോ എന്ന് സംശയമാണ്. വാസ്തുവിദ്യയുടെ പഠനകാലത്തും ഇത്തരം ആധുനിക കരണങ്ങള്‍ പഠനവിഷയമാക്കപ്പെടുന്നില്ല. പ്രായോഗികതലത്തിലും അറിവ് കുറവ് തന്നെയാണ്. എന്നാല്‍ വരുംകാലത്തിന്‍റെ പ്രമാണങ്ങള്‍ ഇത്തരം ശാസ്ത്ര സൂത്രങ്ങളില്‍ അധിഷ്ഠിതമായിരിക്കും. ഇവ കരസ്ഥവും ഗ്രഹസ്ഥവുമാക്കാന്‍ വൈകുംതോറും വാസ്തുശില്പികള്‍ പുറന്തള്ളപ്പെടും. ഗഗനചാരികള്‍ക്കൊപ്പം സഞ്ചരിക്കുമ്പോഴും മനസ്സിലെ ആര്‍ദ്രത കൈവിടാതെ സമൂഹത്തോടൊപ്പം നില്‍ക്കാനും സാധിക്കണം. സ്നേഹവും സന്തോഷവും ചാലിച്ച് ആധു നിക സാങ്കേതികവിദ്യയുടെ പരമാവധി സാധ്യതകള്‍ സന്നിവേശിപ്പിച്ച് ലോകോത്തരമായ സൃഷ്ടികള്‍ ഉണ്ടാക്കാന്‍ വാസ്തുശില്പി സമൂഹം തയ്യാറെടുക്കട്ടെ.

ആശംസകള്‍...

- എല്‍. ഗോപകുമാര്‍ (ചീഫ് എഡിറ്റര്‍).