കോവിഡിന്‍റെ കോലാഹലം ഒന്നൊതുങ്ങിയതോടെ മെല്ലെ മെല്ലെ എല്ലാം പഴയ പടിയാകുന്നു. ന്യൂ നോര്‍മല്‍ ചിന്താഗതികള്‍ മാറുന്നു. എല്ലാം പണ്ടേ പോലെ സാധാരണം. ഹര്‍ത്താല്‍ മുതല്‍ ഹവാല വരെ എല്ലാം തിരികെ കളം പിടിക്കുന്നുമുണ്ട്! നിര്‍മ്മാണ മേഖലയില്‍ നിര്‍മ്മാണച്ചെലവില്‍ വന്ന വര്‍ദ്ധനവല്ലാതെ ഡിസൈന്‍ പരമായ വലിയ മാറ്റങ്ങളൊന്നും പ്രകടമല്ല. സ്പേസ് പ്ലാനിങ്ങില്‍ കുറച്ചു കൂടി ദീര്‍ഘവീക്ഷണം, ഇന്‍റീരിയര്‍ ഡെക്കറേഷനില്‍ കൂടുതല്‍ മിതത്വം, എല്ലാ വിഭവങ്ങളും എല്ലാ കാലത്തും സമൃദ്ധമായിക്കൊള്ളണമെന്നില്ല എന്ന തിരിച്ചറിവോടെ അവയുടെ ഔചിത്യപൂര്‍ണ്ണമായ ഉപയോഗം ഇത്തരം കാര്യങ്ങള്‍ക്ക് അല്പം പ്രായോഗിക ബോധവും യാഥാര്‍ത്ഥ്യ ബോധവും കൈവന്നിട്ടുണ്ട്. ചുരുക്കമായിട്ടാണെങ്കിലും പല പരീക്ഷണ നിര്‍മ്മിതികളും സാമഗ്രികളും കാണാനാകും.
ലാളിത്യവും മിതത്വവുമെല്ലാം കുറച്ചു കാലങ്ങളായിട്ട് ഡിസൈന്‍ രംഗത്ത് പ്രസക്തമാണെങ്കില്‍ കൂടി എളുപ്പത്തില്‍ മാറ്റാവുന്നതും മെയിന്‍റനന്‍സ് നടത്താവുന്നതുമായ ഒരുക്കങ്ങള്‍ക്കാണ് താല്‍പ്പര്യക്കാര്‍ കൂടുതല്‍. അതുകൊണ്ടായിരിക്കണം പഴയ ഹെവി ഇന്‍റീരിയറുകളെ ഒന്നുടച്ചുവാര്‍ത്ത് ലൈറ്റാക്കുന്ന പ്രവണത കാണാനുണ്ട്. രണ്ടു വര്‍ഷത്തെ അടച്ചിടല്‍ മൂലം രൂപവും ധര്‍മ്മവും തന്നെ മാറിപ്പോയ കെട്ടിടങ്ങള്‍ നിരവധിയാണ്. വീടുകള്‍ ഓഫീസുകളാകുന്നു. ഓഫീസുകള്‍ വീടുകളാകുന്നു. ഹോസ്പിറ്റലുകള്‍ ഹോട്ടലുകളാകുന്നു. എല്ലാം സ്ട്രക്ചറില്‍ കൈ വെയ്ക്കാതെയുള്ള മിനിമം കലാ പരിപാടികള്‍ മാത്രം. ഇതിനു കാരണം സാമ്പത്തിക മാന്ദ്യം തന്നെയായിരിക്കണം. എന്തായാലും ഇത്തരം ചെറു നീക്കങ്ങള്‍ വഴി ഇന്‍റീരിയര്‍ ഡിസൈനര്‍മാര്‍ക്ക് വേണ്ടത്ര പണിയുണ്ട് ഇപ്പോള്‍. പുതുതായി ആരംഭിക്കുന്ന നിരവധി ഇന്‍റീരിയര്‍ കണ്‍സള്‍ട്ടന്‍സി സ്ഥാപനങ്ങള്‍ തന്നെ ഇതിനു തെളിവ്. നിര്‍മ്മാണ മേഖലയിലെ ഒരു ശാഖയെങ്കില്‍ ഒരു ശാഖ അത് പുഷ്ടിപ്പെടട്ടെ; വളരട്ടെ എന്ന് പ്രാര്‍ത്ഥിയ്ക്കാം.
