കേരളത്തിന്‍റെ നിര്‍മ്മാണ മേഖലയില്‍ ഏറ്റവും വലിയ പങ്കുവഹിക്കുന്നത് സര്‍ക്കാരാണ്. സര്‍ക്കാര്‍ വകുപ്പുകള്‍ നിര്‍മ്മിക്കുന്ന ഓരോ കെട്ടിടവും നാടിന്‍റെ മുഖമാണ്. എന്നാല്‍ പലപ്പോഴും ഈ നിര്‍മ്മാണ പ്രവര്‍ത്തനങ്ങളും ആര്‍ക്കിടെക്ചര്‍ എന്ന പ്രൊഫഷനും തമ്മില്‍ വലിയ അകലമുണ്ട്. ഈ അകലം ഇനിയെങ്കിലും ഇല്ലാതാക്കേണ്ടതുണ്ട്. സര്‍ക്കാര്‍ വകുപ്പുകളും ആര്‍ക്കിടെക്റ്റുകളും തമ്മിലുള്ള ബന്ധം ശക്തിപ്പെടുത്തേണ്ടത് കാലത്തിന്‍റെ ആവശ്യമാണ്. ഇത് പ്രധാനമായും രണ്ട് തലങ്ങളില്‍ മുന്നോട്ടു പോകണം.
ഇന്ന് ആര്‍ക്കിടെക്റ്റുകള്‍ നേരിടുന്ന പ്രധാന വെല്ലുവിളികളിലൊന്ന് മിനിമം ഫീസ് നടപ്പാക്കാത്തതാണ്.ഫീസ് കുറയ്ക്കുന്നത് കേവലം സാമ്പത്തിക പ്രശ്നമല്ല; അത് ഡിസൈനിന്‍റെ ഗുണനിലവാരത്തെയും നേരിട്ട് ബാധിക്കുന്ന വിഷയമാണ്. കുറഞ്ഞ പ്രതിഫലത്തില്‍ ആവശ്യമായ ഗവേഷണവും പഠനവും, സുസ്ഥിരമായ ഡിസൈനും, സുരക്ഷ ഉറപ്പാക്കുന്നതിനുള്ള പ്രൊഫഷണല്‍ ഇടപെടലുകളും ഗൗരവത്തോടെ നിര്‍വഹിക്കുന്നത് പ്രയാസകരമാണ്. സര്‍ക്കാര്‍ ടെന്‍ഡറുകളില്‍ IIA നിര്‍ദ്ദേശിക്കുന്ന മിനിമം ഫീസ് മാനദണ്ഡങ്ങള്‍ പരിഗണിച്ച് ആവശ്യമായ നടപടികള്‍ സ്വീകരിക്കാന്‍ സര്‍ക്കാര്‍ തയ്യാറാകണം. അതായിരിക്കും പരസ്പര വിശ്വാസം ശക്തിപ്പെടുത്തുന്നതിനുള്ള ആദ്യപടി.
ഒരു കെട്ടിടം വെറും നാല് ചുമരുകളല്ല. അത് നമ്മുടെ സംസ്കാരവും ചരിത്രവും ജീവിതരീതിയും പ്രതിഫലിപ്പിക്കണം. പ്രത്യേകിച്ച് ടൂറിസം മേഖലയിലെ കെട്ടിടങ്ങള്‍ക്ക് ഇക്കാര്യത്തില്‍ വലിയ പ്രാധാന്യമുണ്ട്. കേരളത്തിലെത്തുന്ന ഒരു സഞ്ചാരി നമ്മുടെ കെട്ടിടങ്ങളിലും കേരളത്തെ കാണണം. നമ്മുടെ കാലാവസ്ഥയ്ക്കും ഭൂപ്രകൃതിക്കും ജീവിതരീതിക്കും അനുയോജ്യമായ, തടി, ഓട്, മുറ്റം തുടങ്ങിയ പ്രാദേശിക ഘടകങ്ങളെ സര്‍ഗാത്മകമായി ഉള്‍ക്കൊള്ളുന്ന സുസ്ഥിര നിര്‍മ്മാണങ്ങളാണ് നമുക്ക് വേണ്ടത്. ഇത് പതിവ് പ്ലാനുകളിലൂടെ മാത്രം സാധ്യമാകില്ല. അതിന് ആര്‍ക്കിടെക്റ്റിന്‍റെ ഭാവനയും പഠനവും പ്രാദേശിക സാഹചര്യങ്ങളെക്കുറിച്ചുള്ള ആഴത്തിലുള്ള അറിവും ആവശ്യമാണ്.
ഇതിനായി ഒരു സ്ഥിരം സംവിധാനവും അനിവാര്യമാണ്.PWD, ടൂറിസം, തദ്ദേശ സ്വയംഭരണം തുടങ്ങിയ സര്‍ക്കാര്‍ വകുപ്പുകളും IIA യും തമ്മില്‍ നിരന്തരമായ സംവാദത്തിനും ആശയവിനിമയത്തിനുമായി ഒരു സ്ഥിരം വേദി രൂപീകരിക്കണം. പദ്ധതികള്‍ ടെന്‍ഡര്‍ ചെയ്യുന്നതിന് മുന്‍പ് തന്നെ ആര്‍ക്കിടെക്റ്റുകളുമായി ചര്‍ച്ചകള്‍ നടക്കണം. അങ്ങനെ ചെയ്താല്‍ കെട്ടിടത്തിന്‍റെ രൂപകല്‍പ്പനയും ഉപയോഗക്ഷമതയും സുസ്ഥിരതയും ചെലവുകാര്യക്ഷമതയും ഒരുമിച്ച് പരിഗണിക്കാനാകും. സര്‍ക്കാര്‍ ആര്‍ക്കിടെക്റ്റിനെ ഒരു കോണ്‍ട്രാക്ടറായി മാത്രം കാണാതെ, രാജ്യനിര്‍മ്മാണത്തിലെ പങ്കാളിയായി കാണുമ്പോഴാണ് യഥാര്‍ത്ഥ മാറ്റം ഉണ്ടാകുന്നത്. നല്ല കെട്ടിടങ്ങള്‍ പണിയുന്നതിനൊപ്പം നമുക്ക് പരസ്പര വിശ്വാസവും പണിയാം.
- എല്‍. ഗോപകുമാര്‍ (ചീഫ് എഡിറ്റര്‍).
2025-2026© Designer Publications Kerala Pvt.Ltd.. All Rights Reserved.
